......2000年科網股泡沫爆破後，需要三年時間才復元；呢次CDO問題咁快便搞掂?!2008年10月嗰次反彈維持四十九個交易天，呢次反彈如果亦係四十九個交易天，高潮便喺5月20日。歷史上最長嘅反彈市喺1930年美股，曾維持六十五個交易天。3月份美國消費者信貸減少111億美元，因失業率上升及銀行收緊信貸；由2007年高峰至今，美國消費者共失去2.55萬億美元信貸，較估計中大三倍。响咁嘅情況下，經濟可以復甦咩?!
《黑天鵝》作者Nassim Nicholas Taleb認為，2007年10月開始嘅環球經濟危機較1930年代更嚴重，因為家吓全球經濟更緊密地連在一起。紐約大學教授魯賓尼認為，政府估計第三季及第四季復甦未免太樂觀矣。經濟收縮速度在最近兩季的確放緩，但相信今年及明年GDP仍然係負增長。Taleb教授認為，依家最大威脅係通縮，政府不斷注資，可暫緩通縮壓力，但已令金價、銅價及油價响今年內回升。中國政府刺激方案可避免經濟陷入衰退，但中國經濟過分依賴美國同歐洲，最終仍然難以幸免。3月9日開始嘅反彈，至今為止基礎良好嘅股份平均升幅32％，基礎極差嘅股份平均升幅68％！上述情況已清楚告訴大家，呢次係熊市二期嘅大反彈，而唔係牛市一期。上升理由係炒家入市，唔係投資者入市。上述數字應可回答大家邊個喺5月份入貨?!VIX指數由今年1月嘅57點回落到5月初嘅34點，代表散戶由恐慌轉為樂觀。如VIX回升到40點，代表反彈市玩完。各位仲記得去年10月貝南奇估計美國衰退會响聖誕節後結束嗎？結果係美股今年1月6日起又再回落。呢次佢保守D估計衰退喺今年第三季結束，結果又會點？世上冇人擁有預測能力。各位請記住，Easy Money時代已結束，今天已變成Easy come, easy go。(節錄)
《轉載自信報財經新聞》
