入行四十年三大狂潮
2007年次按危機引發2008年金融海嘯，下一步係乜嘢？不在乎邊個上台，只在乎佢做什麼？三十年代美國羅斯福上台帶來「新經濟政策」，引入社會主義制度，改善資本主義嘅缺點。今天美國面對過度伸展嘅金融業，奧巴馬上台後又帶來乜嘢？响奧巴馬政策未落實前，一切所謂分析都唔成熟。未來美國經濟可能係九十年代日本，亦有機會成為三十年代美國或者近代阿根廷，甚至乜嘢都唔係，而係開創新境界。
我老曹入行四十年，經歷過三大狂潮：
一、1971年美元放棄金本位，引發七十年代高通脹期。金價由42美元一盎斯升上1980年1月850美元。呢十年嘅投資策略係點樣喺高通脹中獲利？
二、1984年7月中英聯合聲明達成初步協議，除保證香港資本主義制度五十年不變外，亦限制香港政府每年賣地五十公頃至1997年6月30日止，因此帶來香港十三年樓價狂升期，香港進入買樓（或地產股）可以發達期。
三、2001年1月美元利率由6.5厘回落到2003年年中1厘，美國進入負利率時代。信貸膨脹引發美國樓價及股市狂升，最終以次按危機結束。港股亦由2003年4月上升至2007年10月，恒生指數由8000多點升上32000點，上升四倍。
中國雄起係未來大趨勢
有智慧不如趨勢。上述三個大趨勢，任何一個都可帶來驚人回報。未來大趨勢將係「中國雄起」。2008年開始中國經濟進入轉型期，估計需時三年，即2010年底前中國經濟應進入另一上升周期；反之，美國衰退期由2007年第四季開始，短則三年，長則五年甚至七年或以上。
過去已成過去。2007至08年A股股民嘅遭遇一如1973至74年香港小投資者，此乃成熟前嘅陣痛，差唔多每一個地區或國家皆必經過。情況有如1929年美國華爾街，必須經過這樣嘅洗練，投資者才能成熟，不然一如日本到1990年才爆發，情況可能更悽慘。換言之，超級大熊市愈早出現愈好！
中國經濟轉型嘅最大阻力，係中國現今仍然國富民窮。反觀日本1950至80年日本人工資增長速度較美國快70％，中國由1978至2007年工資增長速度只較美國快4％！2007年全國職工工資總額加上農村居民現金收入只佔GDP 23.6％。全國城鎮居民人均收入13786元人民幣，農村居民人均收入4140元人民幣。過去三十年改革開放政策嘅受惠者係企業家同國家（稅收大增及國企股市值大增），勞動人民收益升幅並唔大。如要進入內需帶動型經濟，必須將依家嘅國富民窮情況扭轉為國窮民富，例如全面降低稅收、提供社會福利、努力還富於民，不然內需型經濟無法喺中國境內出現。
恒指高潮估計在09年初
2008年已進入結局篇，又到咗預測滿天飛嘅時候。我老曹一向唔信預測，因為預測十之八九唔準。我老曹依賴嘅係分析，透過深入分析去預期（anticipate）事情發展，而非預測（predict）。任何事物發生必定有前因後果。明白前因便可預知後果。2007年11月3日總理溫家寶已講明：「港股直通車無法開出」。理性預期係恒生指數應由32000點重返18000點（2007年8月冇港股直通車傳聞前嘅水平），上述乃理性預期，而非預測，因此當恒指重返18000點出現強大支持。今年9月雷曼事件令恒指18000點失守，以量度跌幅計（由32000點回落到18000點下跌43.7％，一旦18000點失守，必須再下跌43.7％或約7866點，即下一站睇10134點）。事實上，恒指跌到10月27日喺10678點獲支持，完成量度跌幅，11月份出現一浪高於一浪，即短期可睇好，估計高潮喺2009年年初。上述分析乃理性預期，並非預測。
唔研究歷史，便會重複前人嘅錯誤。1997年7月前我老曹出售香港物業、進軍倫敦物業市場，靈感來自九十年代日本房地產嘅表現。2006至08年過去三年我老曹撤出倫敦物業市場，靈感來自1997年7月後香港。太陽底下無新事，我地所面對嘅客觀環境，必可在歷史上搵到雷同。例如2007年10月次按危機發生後，我老曹便一再引用1990年至今日本嘅情況，協助大家了解未來美國金融市場將點樣演繹。每一個人嘅判斷力（judgement）必定受個人世界觀或人生觀所影響，即係話你點睇呢個世界？分析絕對係主觀，唔會客觀。
例如我老曹唔信石油供應會短缺，今年7月認為油價必跌而建議大家出售資源股。同樣理由我老曹唔信2009年油價可大幅上升，石油近日回升只係超賣後反彈，估計2009年油價喺35美元之上、55美元之下牛皮，低於40美元一桶嘅油價應該見底，但上升乏力，因無論俄羅斯或海灣國家都面對財政壓力，2009年不得不賤賣石油；加上液化天然氣（LNG）發展迅速，將成為未來十年嘅主要燃料。如世界經濟2009年出現衰退，可令石油需求量較事前估計減少2.4％，兩大因素加起來，估計油價喺2009年內都無法重返60美元以上（响自由市場冇任何物質會出現短缺，因為一旦出現短缺，價格便上升，需求便下降，替代品便出現。任何短缺都只係暫時性而唔係永久性，包括石油在內）。
人類分析事物可分為三個時期。第一階段，知其然而不知其所以然。面對太多事物無法解釋，認為未來係不可預測，因此我地希望有先知，並漸漸發展出鬼神論。有人信命、有人信風水、有人乜都信……或認為一切都係神嘅意旨，天命不可違。此乃風水大師咁流行嘅理由。
第二階段，人類漸漸了解盛衰循環，發現好多事物不離周期（cycle），明白白晝與黑夜出現係地球自轉所形成，春去夏來因地軸傾斜。太陽黑子每十一年周期，令經濟盛衰周期亦大約十一年。較大循環係五十五年到六十五年，此乃北回歸線同南回歸線每年略有偏差，成為農產品周期。然後係一百一十年、二百五十年，最長循環係五百一十年。即五百一十年西方由衰而盛、五百一十年東方由盛而衰，主因係文化唔同、對氣候反應唔同結果。1941年係西方盛極年，開始步入衰退；東方則衰極，開始興盛。第一個五十五至六十五年循環周期，西方國家將盡一切努力去保持本身經濟繁榮（例如美國借到盡）；反之第一個五十五至六十五年周期，東方情況十分混亂，例如第二次世界大戰中日本被美國打敗；中國則出現國共之爭、文化大革命；印度出現印巴之戰等。2007年起西方經濟已完成第一衰敗循環周期，東方經濟亦完成第一個興盛循環周期，步入第二個大循環周期。西方經濟將迅速下滑、東方經濟將迅速冒起。作為投資者，宜向東望，而非向西走……。
循環周期朝着一個方向
年紀漸大，經歷多次盛衰循環後，發現周期之外，亦有一個方向，即循環周期唔係重複再重複，而係朝向一個方向──即人類內心深處嘅渴求。每一循環之後，人類皆向一個正確方向走出一大步。
大部分人嘅思想每二十年改變一次。例如二十歲後諗法往往同二十歲前唔同；四十歲後諗法又同二十歲時唔同；六十歲諗法又同四十歲時唔同。例如自己二十歲時，最有興趣追女仔（當年寫稿目的亦係為咗賺錢追女仔，唔係為各位提供服務）；四十歲起才認真追求財富；六十歲便改為追求快樂。各位要到達上述年齡，才了解別人嘅諗法，此亦係2009年1月起我老曹開始半退休嘅理由。
以《貨幣戰爭》一書成名嘅經濟學家宋鴻兵喺《證券日報》發表文章，估計金融危機第二波响2009年3月出現。參考1929至32年大蕭條，當政府救市策略失敗後，便出現第二波衝擊，其破壞力較第一波更大。估計今年10月至明年2月係緩衝期，當人們發現政府嘅救市策略解決不了問題，第二波便出現。佢認為，美國房價至今已下跌30％，約二百一十五萬棟房屋被銀行沒收並進行拍賣，美國人開始顯著減少消費。宋鴻兵認為，美國經濟喺2012年前好難復甦，而金融危機正向債市擴散。
中國比較美國好，家吓正面臨結構調整，但遠水救不了近火，响美國面對第二波衝擊時，中國經濟也好唔到幾多。中國只能喺金融危機下擔遮——擔遮唔保證喺暴雨中不被淋濕，但總較乜都冇好。結構轉型不能完全阻擋金融風暴衝擊，至少可減低損失。（節錄）
《轉載自信報財經新聞》
