資本主義制度並非完美制度，佢首先承認人性係醜惡，因此需要法律去規範，才可達致公平競爭環境，再以道德理由去吸引成功資本家回饋社會。三十年改革開放政策後嘅中國，大家都睇見內地成功資本家回饋社會嘅行為。誰說資本家係醜陋嘅？只要政府嚴格執法去對付無良資本家，以維護公平競爭環境，資本家成功後便 紛紛回饋社會。資本主義雖然醜陋（ugly），但並唔壞（bad）。
我老曹1967年到社會做事至今四十年，亦見到香港出現唔少泡沫形成、爆破，喺過程中雖有唔少投資者損失慘重，同時孕育出今天香港嘅大企業；反之，喺泡沫形成初期已刺破它，政府過分干預市場，反而不妙。資本主義精神：成功者上天堂，失敗者下地獄！
好多人以為賺大錢必須冒高風險（富向險中求），事實剛剛相反，風險與報酬並唔係常常掛鈎，而係要明白「價值」所在。例如2001年美國開始減息時持有黃金、資源股、澳元及加元，當年上述投資風險唔大；近日美元減息周期已近尾聲，今天投資黃金、資源股、澳元及加元未來報酬有幾多？由2002年至今美元已下跌七年（各位仲記得七隻肥牛嘅故事咩？），今天資產淨值1元嘅工業股，市價只賣0.5元，你買入後可能再跌至0.35元而吃咗眼前虧，只要捱過困難期， 或遲或早佢又會返回合理價值1元或以上。如以0.5元買入，日後可獲利 100％；如能喺0.35元買入、獲利200％。唔少人話君子不吃眼前虧，我老曹經驗係不吃眼前虧者非君子！
《轉載自信報財經新聞》
