曹仁超 投資者日記 2008-02-19 (節錄)
我老曹係早婚嘅支持者，二十五歲便結婚，因我老曹相信「已婚男士係較佳投資者」嘅理論。一、兩個人共同生活，較兩個人分開生活更省錢。二、婚後令男女雙方更努力工作。三、結婚令男士更專心工作，拍拖卻係最浪費時間嘅行為。
唔少鑽石王老五事業都十分成功，不過社會上大部分成功男士都係已婚男士。結婚對女士事業係咪有幫助，我老曹木宰羊，但對男士而言一定有幫助！找個好伴侶結婚，然後心無旁騖努力自己嘅事業；先成家、後立業係我老曹嘅忠告。我老曹唔相信遲婚有助事業，二十五至三十歲男士係適婚年齡，而且愈早愈好。二十五歲開始專心事業同三十歲始專心事業，大家到六十歲時分別有幾大？答案係二十五歲以10萬元起步每年投資回報25％，到六十歲身家可達2465萬元；三十歲以10萬元起步同樣每年投資回報25％，六十歲時只有646萬元），即早起步五年者較遲起步五年者，大家到六十歲退休時身家差距達四倍！
當然，生活與良好投資之間必須取得平衡（但我地不應為嗜好而放棄良好投資，同樣不應為良好投資而令生活過得刻板）。努力工作唔代表生活刻板，投資成功最重要係staying focused，而非日日努力工作。例如去年10月前將注意力集中在股市，11月股市高潮之後又不妨抽時間同另一半好好享受一下投資成果。成功trader唔係天天炒股，通常一年只工作四分三日子，其餘四分一日子享受人生。
成功trader都有謙遜嘅性格，略帶點樸素生活，好少在公開場合大發偉論，只有輸家才有偏激言論及魯莽性格。唔係成功人士喜歡低調，而係低調性格者較易成功；唔係失敗者魯莽，而係魯莽性格往往招致損失。
《轉載自信報財經新聞》
沒有留言:
發佈留言